Su diesmol gibds e bille wos neizeidlischers von mir.
S ´war namisch erscht vorsche Woche, do hab isch am Aamd im Fernsehn sune Verleihung gesahn. Erschnd sue Preis for Kinosticke. Schklab s´hies zegor wie unner leimscher Pfarrer, schwees bluß net, wies zamgitt.
Nu, jedenfalls haddn se een Film dorbei, dar had egal wieder Preise gekrischt. Sticker elfe worns zum Schluß. Dor Rescheseer sah zwar bille verwuchn aus, eher wie dor Reinhold Meßner (dar Bergsteicher darn Jedi un in gleischnamischn Dee endeckt had). Aber wennse sun Haufm Dropheen dorfier ausgehändschd krieschn muß dor Film doch a was dachn.
Un dor Name wor a vielvorsprachnd. De Rickkehr vom Keenisch. Do habsch gedachd, do werd nu sischerlisch dar Filmemacher e Stick ibers neiseeländische Keenischshaus gedreht ham, denn do worer haar.
Un seid de Dajana duud is, dun sisch de Hulda, de Else un isch suwiesu e bille schwer mid der englischn Monarschie. Nu un wu nochar noch de Queen Mamm gestorm is, se wor ja fast unner Alder, do wors gans vorbei.
Do dachd isch, guggst mol daan Film, vielleischd lernste ne neie Adelsfamilie kenn, wu sischs verehrn wieder lunt. Also habsch n näschstn Doch mein Urengln gefrochd, obse mol mid mir gien däd. Isch kenn misch ja nu a nimmer su aus mid dor Wald. Un s is a schun ibor fuftsch gor har, das´sch im Kino wor, weil do su e alder Mist kom. Nuja, de Urengln had sisch zwor gewunnerd, was´sch in dann Film weld, aber mer sin zesam geforn, s sprang schließlisch e ne Korde for sie mid raus.
Drinne im Kino habsch misch nein mein Sitz gerischt, swar wie in dor gudn Stube, net wie friher die aldn Klabstiele. Dann gings Lischd aus un isch wor schun gans gespannd, aber s´kam Werbung, eene noch dor annern, 3 mol su lang wie im Fernsehn. Nochar gings Lischd wieder an, gobs Eis. Isch denk nee, die elendn Hunne, egal daldsn was annersch, wenns bassd mismer noch allezamm ne Dornibung machn ehs lusgitt.
Isch hab mer aber a e Eis gekaafd, mer wees ja nie ob mers nochemol orlabd.
Nu gings Lischd wieder aus un wees dor Herre, dor Film ging a lus.
Nu das schnorrisch Zeisch. Nischd mid brunkvolln Balästn un nor scheen Keenischsfamilie in edln Gewändern. Do sin ein boor Gestaldn rumgerammld, die meschd mor ned dud im Gordn lischn ham. De Biesewischde haddn alle schrumblische Frassn und worn ald dragsch. Die kleene Sorde von danne konnd gor ned grode gien un ham geguggd wie e derrer Greiblkuchn wenner nein Schlamm geflochn wor, bluß noch mid ner grumm Nose middndrinne. Un de Grußn worn glabisch aus Uruguay, worum wesisch a net, de annen Länder im Film hammer alle nischd gesochd un de Städde hiesn a butzsch ned su emfach wie Leim oder Triebs.
Nuja un de Guudn die ginge hallwachs, zwar alles langhoorsche Karle, aber sís ja a wieder im kumm heidzedoche. Dar eene, das wor e scheener Mann, un wie sisch zum Schluß hin a rausgestelld had worer zegor dor Keenisch, aber ned von Neuseeland. Dann haddnse noch n kleen Feddn su huch wie breed un n Bort su struwelisch wie dor Rescheseer un dor Meßner zamm. Das solld e Zwersch sein. Naja, ne Axt hadder gehabd, aber keene Zipfelmitze. Un dann wor noche Buchnschitze, ne huchgeschossne, derre Berson mid kommschn Ohrn. Von dan seiner Sorde haddnse a noch annre. Das wern de Elbn. Isch for mein Deel kenn ja nur Elfn. Isch deng mer nor, dar die Geschischde geschriem had, hadde bille n Sprochfahler. Meschd wissn ob dar a su gezeeld had: zahn elb zwelb.
Un dann ham noch su bor Kleenwiegsische midgespield. Zwee wor eschndlisch nor am Unnitzn.Un die annern zwee, das missn de Haubdberson gewasn sin, die hamse namisch am effdestn gezeischd. Die worn unnerwachs sun goldschn Ring nein erschnd Vulkan ze haan, weil sonst dor gresde Halunge de Wald regiern däd un alle Leide dudmachn. Nur mid dann kleen Ring. Sue Zinober. Un das bleede wor, von dan gans Biesn ham se immer nor en Ache gezeischd un das stand in Flamm, das moch verstien war will. Aber wemmer sisch iberleschd, wie grus das eene Ache schon is, kammer verstien, dasse alle Angst for ne haddn. Schmeschd ned wissn wie dar aussieht wenner seine restlischn Kerberdeele gefunden had un seine Bindehaudendzinndung abgeklung is. Uff jeden Fall had das Ache egal guggn wolln wu dor Ring is. Un dar wor be dann zwee Krepfern, un be danne, s´hatsch gans vorgassn, wor noch sune schnorrische Gestald. Ne Kreizung ausn Affe und n Außererdschn, aber deitsch kunder. A wenner manschemol nor mid sisch salber gered had. Do kanner sisch mid dor Else zamduun.
Nuja un wies haldisch su is, de Guudn un de Biesn ham sisch e boor mol geprieschld und de Guudn ham zum Schluß gewonn, a wenn se sisch von etlischn grien Gespanstern ham halfm lassn missn, die dar Eene, dar dor Kenisch wor, noch schnell aus Wald gehuld had. Do ham n Biesn a ihre Elefandn, su gruß wie dor Reißsche Huf, nischd genitzt.
Un die 2 Kleen ham ihrn Ring a nein Vulkan gehaan. Dar eene wolldn zwor doch behaldn, aber dodursch, das mid Schrumbllader bespannde Affnhubfmännlalien a schorf uff dann Ring wor, ham se sisch am Rand vom Vulkan drum gekloppd und dar alde nacksche Affe is zamstn Ring nein Bersch geflochn. Wor isch fruh, wu isch das alde Vieh nimmer hab saan missn. Dann is noch das gruße Ache un de Geschnd drumrum zamgesterzd und de Gudn sin heem gegang un ham sisch gefreed. Un mir sin a heem gegang, isch wusd aber net obsch misch freen solld. Isch glab das reischd mor itze erschdemol wieder for de nestn fuftsch Gor. War sisch solsches Zeisch ausdengd un dann a noch n Leidn vorfierd. Mit dam is gans scheen de Fandasie dorschgegang.