Su, s´hat zwor lange gedauert, eh isch wieder was geschriem hab, ober isch hab misch itze mol wieder dorzu aufgeraffd.
Zeerscht muß isch mol sochen, daß isch su draurisch bin das mir ke eensches Mannsbild geschriem had auf meine Anzeische dohiere. Un de Else und de Hulda ham a bis itze noch keen Brief gekrischt. Schkanns gor net klaam, daß mir 3 ristischn Fraan keene Schangsn mer ham selldn bein Mannern. De Hulda mit ihrn grazieln Gang und de Else mit ihrer zordn Stimme und mei lieblisches Läscheln, das zählt wohl alles nischt ? Un unner riesischer Schatz an Laamserfohrung.
Nuja, die Karle heidzedoche, do dud nor noch s Eiserlische zähln. Wenn de do net de Briste net su gruß wie de Kerbse hast, biste kee rischtscher Mensch for die. Do dun se sich ja heidzedoche solsches Plastegelumbe neinsteggn lassen, wie hieses denn nor glei, Silizium oder suwas. Obwohl isch for mein Deel sochen muß an dor Greeße lischts be mir net, nor de Rischtung is nimmer su.
S´is a egal. S´is suwiesu nimmer su wie frieher middn Mannern und n Fraan. Frieher, do ham mir bis ze unnern achzaantn Laamsjahr keusch gelabt, do kunnt mer sisch auf de Schule un de Lehre konzentriern. Un mit Achzn had mer sisch e stattlisches Mannsbild ausgesucht (freilisch had mor su gedaan wie wenn dor Mann de Fraa ausgesucht hät), is een zwee Johr zam gang und dann is geheirod wurn. Dann kom e halb dutznd Kinner (un wer aufgeklärt worrn wor wußt zegor worum) un mor wor zesamm glicklisch bis ans Laamsende.
Heidzedoche sahn de Kinner im Fernsahn wie Männl un Weibl zamgehern un do werds haldisch a mol ausbrobierd. Un wenn de Eldern se aufklärn wulln un mit rudn Kopp aufm Sofa klemm un verlaachn middn Flaschneffner daaln, do lachn se sisch nor noch kabud.
Nuja un wennse dan Erwachsn sin, do gien se mol mit daam un de Woch späder middn annern un de Woch drauf mit drein gleichzeidisch. Sodom und Gomorra !
Nu un wenns be zween dochemol was ernsters is, un is git daazäschlisch ans heirodn, do is de Auffassung von Ewischkeet a ne annre als frieher. Beim kleenstn Ärscher is die manschemol schon vorbei. Do brauch dor Mann bluß mol fimf Minudn ze späte heem kumm oder se gucktn emol bille falsch von dor Seide an oder s´Assn is bille verbrannd, do wissn se uff emol das se doch net vornanner bestimmd worn un do werd schon wieder geschiedn.
Frieher do wor das gans annersch. Bis das dor Duud eisch scheidn dud !
Nuja zugegaam, frieher gobs hald a efter mol n Kriesch hier in Deitschland, do had sisch mansches a durch eißere Gewald erledischd un mein Letztn habsch eemfach su iberlabbt. Aber isch hab mer nischt ze Schuldn kumm lassn.