Neilisch habisch mol su vor misch hin simbeliert und do is mer e was eingefalln, was´sch eisch itze glei emol erzähln will, weils namisch unnre russschn Besatzer vorsorschlisch aus dor Geschischde gestrischn ham.
Swor glei nochn Kriesch, mir haddn de Russn dohiere. Nu un de Nozis die ham se gleich als erschtes verbudn. Do soch isch a gor nischt, das ham se dorwachn rischtisch gemacht. Aber sgab genuch von dann Nozis, die sisch middn Bersilschein ne reene Wesde verschaffd ham. Un do worne bor ganz elende Hunne dorbei, die ham zegor ihre Bordei weiderfiern wolln. Die ham namisch de NSDAB emfach umbenannd in BKNS. Das heest ausgeschriem Bordei vom kummenistischn Natienalsozielismus. Sue bleeder Name for ne Bordei, zemol dor Kummenismus un dor Natienalsozielismus a su gud zambassn.
Un in Leim gobs ne Ordsgrubbe von danne. Un dor alde Hiddlersch Kurt wor be danne ganz gruß. Un obwuhl alle genau wußdn dasser e alder Nozi wor, hadder sisch trotzdam wus nor ging hingestelld und hadn Leiden einreden wolln, wasse forne guude Bordei wärn. Swär jo alles gor net su schlimm gewasn und de BKNS wär ja was ganz ganz annersch un se welldn keen Kriesch mehr un a keen Milledär, se wärn itze de friedlischste un beste Bordei, dies gäb uff dor Wald un se welldn nor guudes for de Leide.Do frocht mer sisch, ob die de Leide werklisch for su bleede gehaldn ham, solsches Zeisch ze klaam, das middn nein Noom alles ganz annerschrum is.
Nu un do wor dor Kurt nu iberall dor wischdischste. Ze alln meschlischn Vorsammlunge die hallwachs bolidisch worn in Leim worer dorbei. Un weil de Leide ne gekannt ham, ham immer alle glei de Aachn vordreht, wenner nor zor Diere reinkam. Endweder hadder nor drinnegehuggd un spijenierd oder, was noch schlimmer wor, or had sisch mid neingehang. Von nischd ne Ahnung oder a mol nor ne gude Idee wasn Leidn velleischd weiderhalfm kennd, aber su dun wie wennersch Bulver erfundn hätt un alle annern dorbei schlachd machen. Das wor seins. Un wenn de annern zahn mol Rachd gehabd ham, dor Kurt wußts besser un had a keene Ruhe mehr gaam. Wie sune alde Scheißhausfliesche, die sisch, wenste vorgochst, egal wieder an dein Hindern setzt.
Un wenn de dann Kriebl uff dor Stroße gedroffm hast, hadder egol su sieslisch fieslisch gegrinst und scheißfreindlisch gegrießt und scheen gedahn, wie wenner dei bester Freind wär un hinner deim Ricken hadder sonstewas orzähld.
Un ned nor dasser su ofd er was von sisch gaam had nor bleedes Zeisch gequatscht had und rachdschaffnde Leide nein Dragg gezuchn had, diene ned nein Kram gebassd ham. Er had a salber nischd ferdsch gebrachd for de Leide. Wenner nor emol was uff der Beene gestelld hädde, wu mer hed sochn kenn, das haddn Leimschn wos guudes gebrachd, deed isch sochn soller hald redn. Aber war nischd machd, for de Gesellschafd, soll gefällischst a de Gusche haldn und ned n Leidn sochen wolln, wasse machn selldn.
Nuja, s´had dann e schnelles Ende gehobd mit dor BNKS oder wie se hiesn. Wu de Russn spitz gegrischd ham, das das Packsch de Nozis worn, wornse aber schnurstracks verbuudn un in Kurt hamse a midgenomm. S wußt a keener was ausn worn is, swar aber a alln egal.
Heidzedoche gibts jo zum Glick suwas alles gor nimmer.